ប្រែសម្រួល៖ ស-សម្បត្តិ

ឡាំពុង, ស៊ូម៉ាត្រាខាងត្បូង៖ លទ្ធផលវះកាយសពដែលចេញផ្សាយកាលពីថ្ងៃអង្គារ (ថ្ងៃទី១៨ ខែមីនា) ទាក់ទងនឹងការស្លាប់របស់មន្ត្រីប៉ូលិសឥណ្ឌូនេស៊ី៣នាក់ក្នុងអំឡុងពេលបង្ក្រាបទីតាំងល្បែងស៊ីសងមាន់ជល់ខុសច្បាប់នៅខេត្តឡាំពុងកាលពីដើមសប្តាហ៍នេះ បានបង្ហាញថាអ្នកវាយប្រហារបានបាញ់កំភ្លោះសរីរាង្គសំខាន់ៗរបស់ជនរងគ្រោះទាំងបីនាក់ដោយចេតនា ដែលនេះជាការជឿជាក់របស់អាជ្ញាធរ។

ជនសង្ស័យជាអ្នកបាញ់ប្រហារទាំងពីរនាក់ ដែលជាសមាជិកនៃកងទ័ព ត្រូវបានចាប់ខ្លួនហើយ តាមការរាយការណ៍របស់ប្រព័ន្ធផ្សព្វផ្សាយក្នុងស្រុក Detik។

ប្រធានាធិបតីឥណ្ឌូនេស៊ី ប្រាបូវ៉ូ ស៊ូប៊ីយ៉ាន់តូ ក៏បានសម្តែងការសោកស្តាយចំពោះឧបទ្ទវហេតុនេះ។

ការវាយប្រហារនេះបានកើតឡើងនៅពេលដែលក្រុមមន្ត្រី១៧នាក់ ដឹកនាំដោយប្រធានការិយាល័យប៉ូលិសស្រុក លូស៊ីយ៉ាន់តូ បានចុះបង្ក្រាបឆ្មាក់មាន់ជល់នៅភូមិការ៉ាង់ ម៉ានិក ស្ថិតក្នុងស្រុកនេហ្គារ៉ា បាទិន កាលពីថ្ងៃចន្ទ។

ជនសង្ស័យម្នាក់នៃអ្នកបាញ់ប្រហារ ដែលត្រូវបានកំណត់អត្តសញ្ញាណថាជា ប៉េលទូ LS បានចូលខ្លួនឯងនៅស្ថានីយប៉ូលិសនេហ្គារ៉ា បាទិន ប៉ុន្មានម៉ោងក្រោយការបាញ់ប្រហារ ខណៈដែលមិនមានភាពច្បាស់លាស់ថាតើដៃគូរបស់គាត់ គឺលោក កុបកា បាសារ ត្រូវបានចាប់ខ្លួនដោយរបៀបណា។

ស្ថាប័ន Jakarta Globe បានរាយការណ៍ថា ប៉េលទូ LS ដែលជាទាហានថ្នាក់ទាបរបស់កងទ័ព ត្រូវបានចោទប្រកាន់ថាបានបាញ់ប្រហារលើលោក លូស៊ីយ៉ាន់តូ និងមន្ត្រីពីរនាក់ទៀតរបស់គាត់ គឺលោក ប៉េទ្រូស អាប្រីយ៉ាន់តូ និងលោក ហ្គាលីប ស៊ូរយ៉ា ណាន់តា អំឡុងពេលបង្ក្រាប។
មន្ត្រីប៉ូលិសទាំងបីនាក់បានស្លាប់នៅទីតាំង ហើយត្រូវបានបញ្ជូនទៅមន្ទីរពេទ្យប៉ូលិស Bhayangkara នៅឡាំពុងសម្រាប់ការវះកាយសព។

លទ្ធផលនៃការវះកាយសពបានរកឃើញថា លោក លូស៊ីយ៉ាន់តូ ត្រូវបានបាញ់នៅទ្រូងខាងស្តាំ ខណៈដែលលោក ប៉េទ្រូស ត្រូវបានបាញ់ត្រូវភ្នែកខាងឆ្វេង។ ចំណែកឯលោក ហ្គាលីប ត្រូវបានបាញ់ចូលមាត់ នេះបើតាមការប្រាប់របស់ប្រធានប៉ូលិសឡាំពុង អធិការ ហែលមី សាន់ទីកា ដល់ប្រព័ន្ធផ្សព្វផ្សាយ។

“ការស៊ើបអង្កេតបានប្រមូលភស្តុតាង រួមមានទ្រុងប្រយុទ្ធមាន់ជល់ និងគ្រាប់កាំភ្លើង១២គ្រាប់” ហែលមីបានប្រាប់ ដោយត្រូវបានដកស្រង់ដោយ Jakarta Globe។

មិនទាន់មានភាពច្បាស់លាស់ថាហេតុអ្វីបានជាទាហានទាំងនោះបានបើកការបាញ់ប្រហារទៅលើមន្ត្រីទេ ប៉ុន្តែរបាយការណ៍ដំបូងបង្ហាញថាពួកគេមកពីបន្ទាយទាហានក្នុងស្រុកនេហ្គារ៉ា បាទិន។
គណៈកម្មការប៉ូលិសជាតិឥណ្ឌូនេស៊ីបានអំពាវនាវឲ្យមានការស៊ើបអង្កេតយ៉ាងហ្មត់ចត់ចំពោះឧប្បត្តិហេតុដល់ស្លាប់នេះ និងទាមទារឲ្យមានចំណាត់ការផ្លូវច្បាប់យ៉ាងមុឺងម៉ាត់ប្រឆាំងនឹងអ្នកដែលទទួលខុសត្រូវ។

សមាជិកគណៈកម្មការ ឈីរុល អាណាម ក៏បានអំពាវនាវឲ្យអាជ្ញាធរឈានទៅលើសពីការកាត់ទោសជនសង្ស័យវាយប្រហារ និងឲ្យស៊ើបអង្កេតក្រុមឧក្រិដ្ឋជនល្បែងស៊ីសងខុសច្បាប់ដែលនៅពីក្រោយប្រតិបត្តិការមាន់ជល់ ដែលជាសកម្មភាពត្រូវបានហាមឃាត់នៅក្នុងប្រទេស។

ក្នុងពេលជាមួយគ្នានោះ រដ្ឋមន្ត្រីសម្របសម្រួលកិច្ចការនយោបាយនិងសន្តិសុខឥណ្ឌូនេស៊ី លោក ប៊ូឌី ហ្គូណាវ៉ាន់ បានសង្កត់ធ្ងន់លើភាពធ្ងន់ធ្ងរនៃ “ការវាយប្រហារគួរឲ្យស្អប់ខ្ពើម” និងបានណែនាំមេបញ្ជាការកងកម្លាំងប្រដាប់អាវុធ លោក អាហ្គុស ស៊ូប៊ីយ៉ាន់តូ ដើម្បីធានាថាអ្នកដែលទទួលខុសត្រូវនឹងត្រូវប្រឈមនឹងទណ្ឌកម្មធ្ងន់ធ្ងរបំផុត។

“យើងត្រូវអនុញ្ញាតឲ្យដំណើរការដោយត្រឹមត្រូវបន្ត និងធានាថាអ្នកប្រព្រឹត្តទទួលបានការដាក់ទោសអតិបរមា។ ការវាយប្រហារគួរឲ្យស្អប់ខ្ពើមនេះ ដែលបានបណ្តាលឲ្យបាត់បង់ជីវិតមន្ត្រីប៉ូលិសបីនាក់ គឺជាឧក្រិដ្ឋកម្មធ្ងន់ធ្ងរបំផុត” ប៊ូឌីបានប្រាប់ប្រព័ន្ធផ្សព្វផ្សាយ។

ក្រោមច្បាប់ឥណ្ឌូនេស៊ី ការឃាតកម្មដោយចេតនាអាចត្រូវផ្តន្ទាទោសដល់ប្រហារជីវិត។
ប្រធានផ្នែកព័ត៌មាននៃបញ្ជាការទាហានស្រីវីជ័យទី២ ដែលគ្របដណ្តប់លើខេត្តឡាំពុង លោក ស្យាហ៍ ពូត្រា ស៊ីរេហ្គារ បានអះអាងថាពួកគេកំពុងស៊ើបអង្កេតលើការពាក់ព័ន្ធដែលត្រូវបានចោទប្រកាន់របស់សមាជិកយោធាក្នុងឧប្បត្តិហេតុនេះ។

“ប្រសិនបើមានការពាក់ព័ន្ធរបស់បុគ្គលណាម្នាក់ (ពីកងទ័ពឥណ្ឌូនេស៊ី) យើងនឹងដាក់ទណ្ឌកម្មយ៉ាងពិតប្រាកដ” លោក អេកូ បានថ្លែងកាលពីថ្ងៃចន្ទ ដោយត្រូវបានដកស្រង់ដោយ Tempo។
ប៉ូលិសជាតិឥណ្ឌូនេស៊ីបានផ្តល់កិត្តិយសដល់មន្ត្រីប៉ូលិសទាំងបីនាក់ដែលត្រូវបានបាញ់សម្លាប់ ដោយតម្លើងឋានៈក្រោយមរណភាព និងបានប្រកាសអំពីសំណងដល់គ្រួសាររបស់ពួកគេ តាមរបាយការណ៍របស់ Antara។

“ប៉ូលរី (ប៉ូលិសជាតិ) សូមសម្តែងការសោកស្តាយនិងទុក្ខព្រួយយ៉ាងជ្រាលជ្រៅចំពោះការបាត់បង់បុគ្គលិកដែលលះបង់របស់យើង ដែលបានបំពេញភារកិច្ចរបស់ពួកគេក្នុងការបម្រើជាតិ” លោក ទ្រូណូយូដូ វិស្ណុ អាន់ឌីកូ ប្រធានផ្នែកទំនាក់ទំនងសាធារណៈរបស់ប៉ូលិសបានថ្លែងកាលពីថ្ងៃអង្គារ៕